ភ្នំពេញ៖ ក្រសួងស្ថាប័នានាក្នុងរាជធានីភ្នំពេញ និងតាមបណ្ដាខេត្ត បានចូលរួមយ៉ាងគគ្រឹកគគ្រេងក្នុងការការវាយគង ទូងស្គរ បំពងសំឡេងដើម្បីអបអរសាទរការដាក់បញ្ចូលរមណីដ្ឋានប្រាសាទកោះកេរ ទៅក្នុងបញ្ជីបេតិកភណ្ឌពិភពលោក។ ការរៀបចំនេះធ្វើឡើងនៅព្រឹក ថ្ងៃទី២០ ខែកញ្ញា ឆ្នាំ២០២៣នេះ។

រដ្ឋមន្ត្រីក្រសួងនានាបានអញ្ជើញទៅដល់ក្រសួងរបស់ខ្លួនទាំងព្រឹកព្រលឹមដើម្បីអបអរនូវពិធីមួយនេះ ជាមួយមន្ត្រីរាជការចំណុះក្រសួងរបស់ខ្លួនរៀងៗខ្លួន។

នៅព្រឹកនេះរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី ក៏បានចូលរួមវាយគងអបអរសាទរនេះផងដែរ ដោយមានការអបអរសាទរនឹងច្រៀងបទពងសាវតារខ្មែរជាការរម្លឹកដល់វប្បធម៌ និងស្នាដៃដូនតាខ្មែរដែលបានកសាងឡើងសម្រាប់ប្រជាជនកម្ពុជាជំនាន់ក្រោយផងដែរ។

គួរឱ្យដឹងដែរថា រមណីយដ្ឋានប្រាសាទកោះកេរ ត្រូវបានដាក់បញ្ចូលក្នុងបេតិកភណ្ឌវប្បធម៌ពិភពលោក នៃអង្គការយូណេស្កូ នៅក្នុងកិច្ចប្រជុំលើកទី៤៥ របស់គណៈកម្មាធិការបេតិកភណ្ឌពិភពលោក នៅទីក្រុងរីយ៉ាដ ប្រទេសអារ៉ាប៊ីសាអូឌីត នាថ្ងៃ១៧ កញ្ញា ២០២៣។ នេះជាតំបន់រមណីយដ្ឋានទី៤របស់កម្ពុជាហើយដែលបានដាក់បញ្ជូលក្នុងសម្បត្តិរបស់ពិភពលោកបន្ទាប់ពី អង្គរវត្ត ព្រះវិហារ និងប្រាសាទសំបូរព្រៃគុក។

នៅល្ងាចនេះផងដែរក៏មានការរៀបចំពិធីអបអរសាទរធំមួយនៅរាជធានីភ្នំពេញដែលនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នឹងដឹកនាំដោយផ្ទាល់៕